**काठमाडौं, भाद्र १२** – परदेशमा रहेका नेपाली महिलाहरूको जीवनमा आउने संघर्ष र पर्वको सम्झनालाई केन्द्रमा राख्दै, साहित्यकार माधव कल्पितको शब्दरचना रहेकाे नयाँ तीज तथा तिहार सम्बन्धी गीत सार्वजनिक भएको छ।
यस गीतले प्रवासी नेपाली चेलीहरूको मर्मस्पर्शी कथा, पर्वको यादले भरिएको मन, र आफ्नो माटोबाट टाढा रहेर काम गर्न बाध्य महिला दिदीबहिनीहरूको भावनालाई उजागर गरेको छ।
क्यानडामा रहेर उच्च शिक्षा हासिल गरिरहेका ई. समिन खतिवडाले आफ्नो पिताको शब्दरचनामा आधारित यस गीतलाई भिडियोका माध्यमबाट जीवन्त बनाउने प्रयास गरेका छन्।
समिनले परदेशमा बसेर पनि आफ्नो देश, संस्कृति, र नेपाली चेलीहरूको पीडालाई नजिकबाट नियाल्दै, यस सृजनालाई सम्पादन गरेका हुन्।
गीतमा जुनु रिजालको मर्मस्पर्शी स्वरले भावनालाई थप गहिराइ दिएको छ भने संगीतकार बिकास चौधरी र संजय हमालले यसलाई संगीतबाट सजाएका छन्।
गीतमा प्रयोग गरिएका तस्बिर र भिडियो क्लिपहरू एआई उपकरणद्वारा सिर्जित भएका छन्, जसले प्रवासी नेपाली चेलीहरूले आफ्नो घरदेश, परिवार, र संस्कृति सम्झने क्रममा अनुभव गर्ने भावना र पीडालाई स्पष्ट रूपमा प्रस्तुत गर्दछ।
विशेषगरी, तीज र तिहारजस्ता पर्वहरूको समयमा परिवारको यादले चस्मा भएका यी चेलीहरूका कथा यस गीतमा बेजोड रूपमा प्रस्तुत गरिएको छ।
माधव कल्पित नेपाली साहित्यमा आफ्नो विशिष्ट पहिचान बनाइसकेका नाम हुन्। उहाँको यो सृजनाले प्रवासी नेपाली महिलाहरूको जीवनमा आउने पीडा र माया, तीज र तिहारको पर्वको सम्झनालाई जीवित राख्न सहयोग पुर्याउनेछ। उहाँको यस गीतले परदेशमा रहेका नेपाली चेलीहरूलाई मात्र नभई, देशभित्रै रहेका नेपाली जनसमुदायलाई पनि हृदयस्पर्शी बनाउने विश्वास गरिएको छ।
समिन खतिवडाले यो विशेष भिडियो सम्पादन गर्दै, यसलाई घरदेश टाढा रहेका नेपाली चेलीहरूले अनुभव गर्ने वास्तविकता र भावनालाई नेपाली जनमानससम्म पुर्याउन सफल भएका छन्।
