काठमाडौँ । रोजगार अनुमति प्रणाली (ईपीएस) अन्तर्गत दक्षिण कोरिया जान इच्छुक नेपाली युवाहरूको भाषा परीक्षा आजदेखि देशभर सुरु भएको छ। बिहान साढे ९ बजेबाट परीक्षा प्रारम्भ भएको जानकारी ईपीएस शाखाका सूचना अधिकारी राजकिशोर शाहले दिएका छन्।
शाखाका अनुसार पहिलो चरणमा उत्पादन क्षेत्रमा आवेदन दिएका उम्मेदवारहरूको परीक्षा सञ्चालन भइरहेको छ। यस क्षेत्रमा मात्र ६७ हजारले आवेदन दिएका छन्।
आगामी वर्ष २०२५ का लागि कोरिया जान कुल १ लाख २ हजार ५१५ जनाले आवेदन दिएका मध्ये पहिलो चरणका परीक्षार्थीलाई अहिले प्राथमिकता दिइएको हो।
बाँकी ३५ हजार परीक्षार्थीले कृषि तथा पशुपालन समूहका लागि आवेदन दिएको र उनीहरूको भाषा परीक्षा दोस्रो चरणमा सञ्चालन गरिने जनाइएको छ।
ईपीएस शाखाले दुई महिनाभित्र सम्पूर्ण भाषा परीक्षा सम्पन्न गर्ने तयारी गरेकाे छ। हाल दक्षिण कोरियाले श्रमिक भर्ना गर्ने १७ ईपीएस सदस्य राष्ट्रहरूमध्ये नेपाललाई सबैभन्दा बढी श्रमिक पठाउने देशको रूपमा पहिलो प्राथमिकतामा राख्ने गरेको छ।
