आयोजित एक कार्यक्रमबीच ‘पठन संस्कृति वर्ष–२०२६’को घोषणा गरिएको छ ।
कार्यक्रमको उद्देश्यबारे जानकारी दिँदै लेखक तीर्थ सिग्देलले सन् २०२६ लाई पठन संस्कृति वर्षका रूपमा मनाउन सामाजिक स्तरबाट अभियान सुरु गरिएको र यसलाई सरकारी कार्यक्रमका रूपमा अघि बढाउन सरकारसमक्ष ज्ञापन पत्रमार्फत आग्रह गरिने बताए ।
उनका अनुसार पठन संस्कृतिको विकासका लागि संघसंस्था, शैक्षिक प्रतिष्ठान, वित्तीय संस्था, सामाजिक व्यक्तित्व तथा विद्यार्थीहरूलाई लक्षित गर्दै सन्देशमूलक कार्यक्रम सञ्चालन गरिनेछ ।
अभियानअन्तर्गत सबै संघसंस्थासँग सहकार्य गरी विभिन्न सिर्जनात्मक गतिविधि सञ्चालन गर्ने, स्थानीय तहसहित सरोकारवाला संस्थाहरूको सहभागितामा शैक्षिक सरोकार समिति गठन गर्ने तथा समाजमा पठन संस्कृतिको प्रभाव विस्तार गर्ने कार्यक्रम रहेको जनाइएको छ ।
कार्यक्रम अघि स्रष्टाहरु गीता सुवेदी नेपाल, दीपा दाहाल, राजेश ढुङ्गाना, सुनीता तामाङ, मायामितु नेउपाने, रञ्जिता खड्का, केशव आचार्य, भगवती ढुङ्गेल, हरिनारायण भट्टराई, डिल्लीरमण नेपाल, कृष्ण बराल, तुलसीप्रसाद भट्टराई, दुर्गाप्रसाद सिग्देल, केदार शर्मा, रश्मिशेखर सुवेदी, लीला अनमोल, राजकुमार विश्वकर्मा, पुण्यप्रसाद खरेल, कृष्णप्रसाद मिश्र, रेखा सापकोटा, नमुना निरौला दाहाल, दीपेन्द्र आचार्य, लक्ष्मी अच्युत ढुङ्गाना तथा पुष्प शाहलगायतले आफ्ना रचना सुनाएका थिए ।
कार्यक्रममा सहकारी तथा सामाजिक अभियन्ता महेन्द्रकुमार गिरीले झापामा रहेका अस्पतालहरूमा कुरुवाका लागि पुस्तक पढ्ने स्थानको व्यवस्था हुनुपर्ने बताए ।
साहित्य, कला र संस्कृतिलाई समेट्ने कार्यक्रमका लागि एक करोड रुपैयाँको अक्षय कोष स्थापना गर्न अभियान चलाउनुपर्ने उनको सुझाव थियो ।
साथै, हरेक कार्यक्रममा मायाको चिनोका रूपमा पुस्तक उपहार दिने, बच्चाको मुख हेर्न जाँदा पुस्तक लैजाने र यात्रामा पुस्तक बोक्ने संस्कृतिलाई फेशनका रूपमा विकास गर्नुपर्नेमा उनले जोड दिए ।
अभियानका लागि अभियान्ता, वीरता रिडर्स, रिडर्स अभियान नेपाल र झापाली साहित्य समाजको आयोजनामा भएको कार्यक्रमको संयोजन इशा बुक्स सेन्टर, मिडिया रिसर्च सेन्टर तथा सहकार्य न्यूटन्स एजुकेशन एकेडेमीले गरेको थियो ।
कार्यक्रममा झापाका १०० भन्दा बढी साहित्यिक, सामाजिक तथा व्यावसायिक संघसंस्थाका प्रमुख तथा प्रतिनिधि, शैक्षिक प्रतिष्ठान, वित्तीय संस्था, सामाजिक व्यक्तित्व तथा विद्यार्थी गरी करिब २५० जनाको सहभागिता रहेको थियो । सोही अवसरमा गीत, कविता र गजल वाचनलगायत साहित्यिक प्रस्तुतिहरू पनि गरिएको थियो ।
