बुद्धशान्ति । पवन ढकाल,
जहानियाँ राणा शासनको अन्त्य र प्रजातन्त्र प्राप्तिका लागि आफ्नो प्राण आहुति दिने चार महान सहिदहरू—शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठको स्मरणमा आज देशभर झैँ झापाको बुद्धशान्तिमा पनि भव्य रूपमा सहिद दिवस मनाइएको छ।
माघ १० गतेदेखि सुरु भएको सहिद सप्ताहको आज अन्तिम दिन विभिन्न सिर्जनात्मक कार्यक्रम गरी समापन गरिएको छ।
सहिद दिवसको अवसरमा बोल्दै बुद्धशान्ति गाउँपालिकाका अध्यक्ष मनोज प्रसाईंले सहिदको त्यागले नै आज हामीले स्थानीय सरकार र अधिकार प्राप्त गरेको बताउनुभयो। उहाँले भन्नुभयो:
"सहिदहरूले व्यक्तिगत सुखका लागि होइन, समग्र देश र जनताको स्वतन्त्रताका लागि बलिदानी दिएका हुन्। आज हामी जुन कुर्सीमा बसेर जनताको सेवा गरिरहेका छौँ, त्यो उहाँहरूकै रगतको जगमा उभिएको छ। त्यसैले सहिदको सपनाअनुसार सुशासन र समृद्धि कायम गर्नु हाम्रो मुख्य जिम्मेवारी हो।"
त्यसैगरी, राजनीतिक व्यक्तित्व नेत्र रिजालले सहिदको मार्गलाई केवल नारामा मात्र सीमित राख्न नहुनेमा जोड दिनुभयो। उहाँले भन्नुभयो:
"सहिद दिवस वर्षको एक दिन मनाउने औपचारिकता मात्र होइन। यो त आत्मसमीक्षा गर्ने दिन पनि हो। सहिदले देखाएको त्याग र निष्ठाको मार्गमा हामी कति हिँड्न सक्यौँ भन्ने प्रश्न आज हामी सामु खडा छ। उनीहरूको आदर्शलाई व्यवहारमा उतार्नु नै आजको आवश्यकता हो।"
सहिदहरुकै योगदानले आजको परिवर्तन सम्भव भएको बताउँदै अर्का राजनीतिक व्यक्तित्व चक्र शेर्माले भन्नुभयो:
"नेपालमा भएका हरेक राजनीतिक उपलब्धि, मानव अधिकार र नागरिक स्वतन्त्रता सहिदहरुकै बलिदानको प्रतिफल हो। उहाँहरूको विचार र सपनालाई बिर्सिएर अघि बढ्न खोज्नु इतिहासप्रतिको बेइमानी हुनेछ।"
विद्यालयमा सहिदको सम्मान: एरा एभरग्रीन स्कुलको उदाहरणीय कार्य
सहिद दिवसको अवसरमा बिदाको दिन भए तापनि बुद्धशान्ति-३ स्थित एरा एभरग्रीन स्कुलले विद्यार्थीहरूलाई सहिदको योगदान र इतिहासबारे सचेत गराउन विशेष कार्यक्रमको आयोजना गरेको छ।
नयाँ पुस्तालाई सहिदको जीवनी र उनीहरूको त्याग बुझाउन विद्यालयले वक्तृत्वकला र चित्रकला जस्ता गतिविधिमा विद्यार्थीहरूलाई सहभागी गराएको थियो।
विद्यालय प्रशासनका अनुसार, विद्यार्थीहरूलाई केवल किताबी ज्ञानमा मात्र सीमित नराखी राष्ट्रियता र सहिदप्रतिको सम्मान भाव जागृत गराउन यस्तो कार्यक्रम गरिएको हो।
राजधानी काठमाडौँको सहिद गेटदेखि देशका कुना-काप्चासम्म आज प्रभातफेरी, दीप प्रज्वलन र विचार गोष्ठीहरू सम्पन्न भएका छन्।
जानकारहरूका अनुसार सहिदको सपना केवल सत्ता परिवर्तन मात्र नभई सामाजिक न्याय र समानता थियो।
सहिद दिवसको यस विशेष दिनमा बुद्धशान्तिका स्थानीयले समेत सामूहिक रूपमा दीप प्रज्वलन गर्दै अमर सहिदप्रति नमन गरेका छन् र उनीहरूले देखाएको लोकतान्त्रिक मार्गमा हिँड्ने संकल्प दोहोर्याएका छन्।
