पूर्व–पश्चिम राजमार्गअन्तर्गत कन्काई पुलको पश्चिमी भागतर्फ आज बिहान बम जस्तो शंकास्पद वस्तु देखिएको थियो । चारालीस्थित नेपाली सेनाको अरिदमन गणबाट आएको बम डिस्पोजल टोलीले शंकास्पद वस्तु डिस्पोज गरेको हो ।
राजमार्ग हुँदै आवतजावत गर्ने सवारी साधनका चालक तथा यात्रुहरूले पुलको नजिकै शंकास्पद वस्तु देखेपछि प्रहरीलाई खबर गरेका थिए । पुलको प्रवेशद्वारमै शंकास्पद वस्तु फेला परेपछि सम्भावित जोखिमलाई ध्यानमा राख्दै प्रहरीले सो क्षेत्रमा सवारी साधनको आवतजावत रोक लगाएको थियो । जसका कारण पुलको पूर्व–पश्चिमतर्फ सवारी साधन जाम भएको थियो ।
शंकास्पद वस्तु कसले र किन राखेको भन्ने विषयमा केही खुल्न नसकेको र आवश्यक अनुसन्धान सुरु गरिएको प्रहरीले जनाएको छ ।
