झापा, बिर्तामोड — अलैंची प्रशोधन क्षेत्रमा कार्यरत श्रमिक महिलाहरुको स्वास्थ्य अवस्थालाई ध्यानमा राख्दै बिर्तामोडमा एक दिने निःशुल्क स्वास्थ्य शिविर सम्पन्न गरिएको छ।

नेपाल उद्यमशील महिला संघ झापाको आयोजनामा तथा एनएमबी बैंक बिर्तामोडको आर्थिक सहयोग र मनमोहन सामुदायिक अस्पतालको प्राविधिक सहयोगमा शनिबार शिविर सञ्चालन गरिएको हो।

संघकी अध्यक्ष पार्वता खरेल बिमलीको अध्यक्षतामा सम्पन्न उद्घाटन कार्यक्रममा नेपाल पत्रकार महासंघ झापा शाखाका अध्यक्ष एकराज गिरी प्रमुख अतिथिका रुपमा उपस्थित रहेका थिए।

कार्यक्रममा विभिन्न संघ–संस्थाका प्रतिनिधि तथा सरोकारवालाहरुले शिविरको सफलताको शुभकामना व्यक्त गरेका थिए।

शिविरमा अलैंची प्रशोधनमा संलग्न महिलाहरुको स्वास्थ्य परीक्षण गरिएको थियो भने आवश्यक औषधीसमेत निःशुल्क वितरण गरिएको आयोजकले जनाएको छ।

अध्यक्ष बिमलीले महिलाहरुमा देखिएका स्वास्थ्य समस्याको थप उपचारका लागि संघले समन्वय गर्ने प्रतिबद्धता व्यक्त गरिन्।

कार्यक्रममा संघकी उपाध्यक्ष यशोदा प्रसाईले स्वागत मन्तव्य राखेकी थिइन् भने सञ्चालन सचिव चन्द्रकला रिजाल भट्टराईले गरेकी थिइन्। शिविरमा १०० भन्दा बढी महिलाहरुको सहभागिता रहेको थियो।