बुद्धशान्ति, झापा ।
गणेश माध्यमिक बिद्यालयका विद्यार्थी बादल तामाङको नेतृत्वमा ११ सदस्यीय बाल क्लब गठन गरिएको छ।
बुद्धशान्ति गाउँपालिका वडा नं. ४ मा रहेका संस्थागत तथा सामुदायिक विद्यालयहरूका विद्यार्थीहरूलाई संगठित गर्दै एक बाल क्लब गठन गरिएको छ। बुद्धशान्ति गाउँपालिकाको शिक्षा शाखा र महिला तथा बालबालिका शाखाको संयुक्त पहल र संयोजनमा उक्त बाल क्लब गठन गरिएको हो।
श्री गणेश माध्यमिक विद्यालय, जोरपिपलेको सभाहलमा आयोजित एक विशेष कार्यक्रमका बीच ११ सदस्यीय नयाँ बाल क्लबको घोषणा गरिएको छ। बालबालिकाहरूको हकहित संरक्षण, उनीहरूमा लुकेर रहेका प्रतिभा प्रस्फुटन र नेतृत्व क्षमता अभिवृद्धि गर्ने उद्देश्यले वडा स्तरीय यो समिति बनाइएको हो।
कार्यक्रमलाई बुद्धशान्ति गाउँपालिका शिक्षा शाखाका तर्फबाट झलका भट्टराई र महिला तथा बालबालिका शाखाका तर्फबाट मिना विष्टले सहजीकरण गर्नुभएको थियो। कार्यक्रममा बोल्दै सहजकर्ताहरूले बाल क्लबले विद्यालयमा हुने विभिन्न रचनात्मक क्रियाकलापमा विद्यार्थीहरूको भूमिकालाई अझ सक्रिय बनाउने विश्वास व्यक्त गर्नुभयो।
कार्यक्रममा विभिन्न विद्यालयका शिक्षक, प्रतिनिधि र विद्यार्थीहरूको उत्साहजनक सहभागिता रहेको थियो। भने उनीहरूलाई खादा र टीका लगाएर नयाँ जिम्मेवारीका लागि स्वागत तथा सम्मान गरिएको थियो।
अन्तरक्रिया र छलफलपछि सर्वसम्मतिबाट ११ सदस्यीय बाल क्लब गठन गरिएको छ। नवगठित समितिका पदाधिकारीहरूलाई बधाई दिँदै कार्यक्रमका अतिथिहरूले बाल अधिकारको संरक्षण र विद्यालयको शैक्षिक वातावरण सुधारमा क्लबले महत्वपूर्ण भूमिका खेल्ने अपेक्षा राखेका छन्।
