बिर्तामोड । कमल गाउँपालिका -३ केरखामा दुर्घटनामा परेका नातिनी र हजुरबुबाको शव १२ घण्टापछि उठाईएको छ ।
हिजो साँझ भएको दुर्घटनामा मृत्यु भएका सोही स्थानका १२ बर्षकी नातिनी कृपा लिम्बू र उनका हजुरबुबा ६१ बर्षका टेकबहादुर लिम्बूको मृत्यु भएको थियोे ।
जिल्ला ट्राफिक प्रहरी कार्यालय झापाका अनुसार झापाबाट काठमाडौं जाँदै गरेको प्र न १–०१–००१ ख ४३३१ नम्बरको यात्रुबाहक बसले साइकलमा घर फर्किदै गरेका उनिहरुलाई ठक्कर दिएको थियो ।
ठक्करबाट उनीहरुको घटनास्थलमै मृत्यु भएको थियो । उनीहरुको मृत्यु भएपछि पीडित परिवारले त्यस स्थानमा यातायात अवरुद्ध पार्नुका साथै शवलाई सोही स्थानमा राखेर प्रदर्शन गरेका थिए ।
स्थानीयले ढुङ्गामुडा गर्दा घटनास्थल नजिकै रहेको मे १ ख २७४४ नं को र अन्य दुइवटा यात्रुबाहक बस तोडफोड गरेका थिए ।
स्थितिलाई नियन्त्रणमा लिन नेपाल प्रहरी र सशस्त्र प्रहरीले दर्जनौ सेल अश्रुग्यास प्रहार गरेको थियो । घटनामा ९ जना प्रहरी घाइते भएका थिए ।
घटनालाई साम्य बनाउन स्थानीय तहका जनप्रतिनिधिको सक्रियतामा बैठक बसेपनि निष्कर्षमा पुगेको थिएन ।
बिहान ५ बजसम्म चलेको वार्तामा भने पीडित परिवार शव उठाउन तयार रहेका हुन् । शव पोष्टमार्टमको लागि दमक लगिएको छ ।
पीडित परिवारलाई अधिकतम क्षतिपूर्ति उपलब्ध गराउने, घटनाको निष्पक्ष छानविन गर्ने लगायतका सहमति भएको प्रहरीले जनाएको छ । सहमतिपछि यातायात सञ्चालनमा आएको छ ।
