झापा, २८ असार । झापाको कनकाई नगरपालिकामा प्रधानमन्त्री केपी शर्मा ओलीले एक विशेष कार्यक्रमका बिच ५ परिवारलाई सांङकेतिक रुपमा धनीपुर्जा वितरण गर्नुभएको छ ।
आज कनकाई नगरपालिकाको आयोजनामा सम्पन्न कार्यक्रममा प्रधानमन्त्री ओलीको हातबाट कनकाई–३ स्थित सुरुङ्गामा रहेको कनकाई उद्योग वाणिज्य संघको हलमा धनीपुर्जा वितरण गरिएको हो ।
भूमि समस्या समाधान आयोग जिल्ला समितिको सहजीकरण तथा कनकाई नगरपालिकाको आयोजनामा आयोजित कार्यक्रममा आजै तयार भएको अन्य २ सय ८ जनालाई धनीपुर्जा वितरण गरिएको कनकाई नगरपालिका भुमि इकाई समितिकी संयोजक रन्जिता कट्टेलले जानकारी दिनु भयो ।
कार्यक्रमका प्रमुख अतिथी समेत रहनुभएका प्रधानमन्त्री ओलीले आफ्नो नेतृत्वको सरकार बनेपछी भुमिहिन सुकुम्बासी तथा अव्यवस्थित बसोबासीका तथा दलित समुदायलाई व्यवस्थि गर्न आयोग बनाई धनीपूर्जा वितरण कार्यक्रम सञ्चालन गर्दै आएको बताउनुभयो ।
उहाँले एक फरक प्रंसङगमा सरकार आजै ढल्छ भोली नै ढल्क भनेर हुइया नफिजाउन आग्रह गर्नुभयो । उहाँले यो गठबन्धन स्थायित्व र बिकासका लागि रहेको बताउनुभयो ।
उहाँले इमादारिता पूर्वक अबको १ वर्षमा राजीनामा दिने र नेपाली कांग्रेसका सभापति शेरबहादुर देउवालाई प्रधानमन्त्रीमा समर्थन गर्ने भएकाले कसैले फिजाउने भ्रममा नर्पन जनताहरुलाई आग्रह गर्नुभयो ।
नेपाल अहिले बिकासको अभियानमा होमिएको बताउदै केही भएको छैन भनेर निराशामा आफ्नो उर्जाशिल समय व्यतित गर्न नहुने बताउनुभयो ।
२०७४ सालदेखि सुकुम्बासी, अव्यवस्थित बसोबासी तथा दलित समुदायका लागि धनीपुर्जा वितरणको कार्यक्रम सञ्चालन हुँदै कनकाई नगरपालिकाले यसअघि १ सय ६० जनालाई धनीपुर्जा वितरण गरिसकेको छ ।
कनकाई नगरपालिकाका नगर प्रमुख राजेन्द्रकुमार पोखरेलले सम्माननीय प्रधानमन्त्रीको हातबाट धनीपूर्जा वितरण हुनु कनकाई नगरका लागि गौरवको कुरा रहेको बताउनु भयो ।
कनकाई भित्र रहेका कयौ जग्गाहरु विपन्न दलितहरुले १० वर्षभन्दा अगाडीबाट भोक चलन गर्दै आएतापनि समुदायिक बनहरुले दाबी गरिरहदा विपन्न जनताहरुले पाउन नसकेको बताउनुभयो ।
उहाँले जमीन र भौगोलिक समस्याहरुलाई स्पष्ट गर्ने गरि कानुन निर्माण गरि कयौ वर्षबाट भोगचलन गरेका नागरिकको अस्तित्वलाई सम्मान हुने गरि भूमि समस्या समाधान आयोगले काम गर्नेमा आफु आशावादी रहेको बताउनु भयो ।
शनिवार कनकाईमा वडानम्बर ३ मा मात्रै भुमिहिन सुकुम्वासी ५३ जना, भुमिहिन दलित ३ जना र अव्यवस्थित बसोबासीको आधारमा ७१ जना गरि कुल १सय २७ घर परिवारले जग्गा धनीपुर्जा प्राप्त गरेका छन् ।
यस वाहेक वडानम्बर ६ मा अवस्थित बसोबासीको आधारमा ६६ परिवार, भुमिहिन दलित तर्फ २ जना र सुकुम्वासीको आधारमा १२ जना गरि जम्मा ८० जनाले र कनकाई ८ नम्बर वार्डमा १ जना सुकुम्वासीले धनीपुर्जा पाएका थिए ।
धनीपूर्जा वितरण कार्यक्रममा स्थानीयबासी संघीय तथा प्रदेशका मन्त्रि सांसद र तथा पूर्वमुख्य मन्त्रिहरुको उपस्थिती रहेको थियो ।
कार्यक्रममा आयोगका केन्द्रीय अध्यक्ष हरि रिजालले पूर्वदेखि पश्चिम महाकालीसम्म भूमिहीन दलित, सुकुम्बासी र अव्यवस्थित बसोबासीलाई क्रमशः जग्गा धनीपूर्जा वितरण गरिने जानकारी दिनुभयो ।
