झापामा भिन्नै पहिचान बनाउन सफल कनकाई नगरपालिकाले नगरको पहिचान सहतिको आगामी आर्थिक वर्षको नीति, बजेट तथा कार्यक्रमको निलो पुस्तक सार्वजनिकीकरण गरेको छ ।
नागरपालिकाले विशेष कार्यक्रमको आयोजना गरि आर्थिक वर्ष २०८२–२०८३ को नीति , बजेट समेटिएको निलो पुस्तक सार्वजनिकीकरण गरेको हो ।
कनकाई नगरपालिकाका नगरप्रमुख राजेन्द्रकुमार पोखरेलको अध्यक्षतामा सम्पन्न कार्यक्रममा कोशी प्रदेशकाखानेपानी सिचाई तथा उर्जामन्त्री एकराज कार्कीले नगरको पहिचान समेटिएको निलो पुस्तक सार्वजनीकीकरण गर्नुभएको थियो ।
कार्यक्रमलाई सम्बोधन गर्दै मन्त्री कार्कीले पुजीगत खर्च परिचालनमा कनकाइ नगरपालिकाले ८० प्रतिशत भन्दा बढी सफल्ता पाँउनु प्रशासकीय हिसाबले राम्रो रहेको बताउनु भयो ।
उहाँले जनताका पिडालाई सम्बोधन गर्ने गरि बजेट आएकोमा आफु आशाबादी रहेको बताउनुभयो ।
उहाँले कनकाई नगरपालिकाले आर्थिक वर्षको पुस्तक नै प्रकाशन गरेर अन्य पालिकाका लागि उदाहरणीय काम गरेको बताउनुभयो ।
कार्यक्रममा कनकाइ नगरपालिकाकी उप–प्रमुख आशा शर्मा शिवाकोटीले चालु आर्थिक बर्षका २०८२–८३को नीति , बजेट र कार्यक्रम प्रस्तुत गर्नुभएको थियो ।
उहाँले आगामी आर्थिक बर्षका लागि ७० करोड ६९ लाख २५ हजार १०१ रुपैयाको नीति, बजेट विनियोजन गरिएको जानकारी दिनुभयो ।
कार्यक्रममा स्वागत मन्तव्य राख्नुहुँदै नगरपालिकाका प्रमुख प्रशासकीय अधिकृत नारायण न्यौपानेले राम्रो नीति तथा कार्यक्रम ल्याउँदैमा सफल नहुने बताउनुभयो । उहाँले नीति तथा कार्यक्रमलाई कार्यान्वयन गर्दै जनताको अनुहारमा खुसी ल्याउने काम गर्नुपर्नेमा जोड दिनुभयो ।
“आगामी साउनदेखि कात्तिक मसान्तसम्म सबै ठेक्कापट्टा लगाउने काम सक्छौं”, उहाँले भन्नुभयो, “पुस भित्र उपभोक्ता समितिबाट गरिने कामको सम्झौता गरिसक्ने कार्यतालिका बनाएका छौं ।”
सोही कार्यक्रमकाबिच नगरका बिभिन्न क्षेत्रका उत्कृष्ट ब्यक्तित्वहरुलाई पुरस्कृत तथा सम्मान गरिएको छ । नगरले दर्जनवढी उत्कृष्ट ब्यक्तित्वहरुलाई पुरस्कृत तथा सम्मान गरेको हो ।
नगरका उत्कृष्ट करदाता, उत्कृष्ट कृषक, उत्कृष्ट पशुपालक, एसईईमा सामाुदायिक र संस्थागत बिद्यालयबाट उत्कृष्ट नतिजा ल्याउने बिद्यार्थी, उत्कृष्ट उपभोक्ता समिति, उत्कृष्ट निर्माण ब्यवसायी, उत्कृष्ट खेलाडी, उत्कृष्ट सञ्चारकर्मी अर्थात फोटो पत्रकार, उत्कृष्ट नगरका कर्मचारी गरी १६ जनालाई सम्मान तथा पुरस्कृत गरेको छ ।
फोटो पत्रकारका रुपमा विकास उप्रेतीलाई नगद १० हजार रुपैयाँसहित पुरस्कृत गरिएको छ ।
कार्यक्रममा सम्मानीत ब्यक्तित्वका तर्फबाट उत्कृष्ट करदाता कुमारमणि पोखरेल, उत्कृष्ट खेलाडी रोमा थापालगायतले शुभकामना मन्तव्य राख्नुभएको थियो ।
कार्यक्रमको सञ्चालन नगरकी योजना शाखा प्रमुख जमुना कटुवालले गर्नुभएको कार्यक्रममा नगरका वडाध्यक्षहरुसहित जनप्रतिनिधि, बिभिन्न राजनीतिक दलका प्रमुख तथा प्रतिनिधि, कर्मचारी, बिभिन्न संघसंस्थाका प्रमुख तथा प्रतिनिधिलगायतको बाक्लो उपस्थिति रहेको थियो ।
