सिरहा । प्रतिनिधिसभा निर्वाचनको मौन अवधिमा नगदसहित पक्राउ परेका अशेश्वर यादव र उनीसँगै नियन्त्रणमा लिइएका चार जनालाई थप अनुसन्धानका लागि मुख्य निर्वाचन अधिकृतको कार्यालयमा पठाइएको छ।
जिल्ला प्रहरी कार्यालय सिरहाका अनुसार नेपाल–भारत सीमास्थित माडरबाट सदरमुकामतर्फ आउँदै गरेको प्र. २–०२–००१ च ०८७ नम्बरको स्कारपियो गाडीलाई गएराति करिब १२:३० बजे शिवचोकमा संयुक्त चेकजाँचका क्रममा रोकेर तलासी गरिएको थियो।
तलासीका क्रममा गाडीबाट ४ लाख ८७ हजार रुपैयाँ नगद बरामद भएपछि उम्मेदवार यादवसहित पाँच जनालाई नियन्त्रणमा लिइएको प्रहरीले जनाएको छ।
प्रहरीले गाडीबाट मतपत्रसमेत फेला परेको दाबी गरेको छ। बरामद नगद र अन्य सामग्रीबारे विस्तृत अनुसन्धान भइरहेको जिल्ला प्रहरी कार्यालयले जनाएको छ।
प्रहरी स्रोतका अनुसार मौन अवधिमा नगदसहित फेला परेकाले निर्वाचन आचारसंहिता उल्लंघन भएको आशंकामा आवश्यक कानुनी प्रक्रिया अघि बढाइएको छ।
घटनाबारे थप विवरण आउन बाँकी रहेको प्रहरीले जनाएको छ।
