काठमाडौं — चलचित्र विकास बोर्डको सिफारिस तथा नेपाल सरकारको सचिवस्तरीय निर्णयपछि नेपाली चलचित्र क्षेत्रका वरिष्ठ निर्देशक तुलसी घिमिरेलाई मानार्थ नेपाली नागरिकता प्रदान गर्ने प्रक्रिया औपचारिक रूपमा अघि बढाइएको छ।
सूचना तथा सञ्चार मन्त्रालयले गृह मन्त्रालयलाई पत्राचार गर्दै आवश्यक प्रक्रिया पूरा गरी नागरिकता उपलब्ध गराउन अनुरोध गरेको छ।
मन्त्रालयका अनुसार घिमिरेले नेपाली भाषा, कला र संस्कृतिको उत्थानमा पुर्याएको विशिष्ट योगदानको कदर गर्दै यस्तो निर्णय अघि बढाइएको हो।
गृह मन्त्रालयलाई पठाइएको पत्रसँगै घिमिरेको व्यक्तिगत विवरण, कदर तथा सम्मान पत्र तथा मन्त्रालयको निर्णयको प्रतिलिपिसहित आवश्यक कागजात संलग्न गरिएको छ।
शाखा अधिकृत डा. कृष्णबहादुर घिमिरेद्वारा हस्ताक्षरित उक्त पत्रमार्फत नागरिकता प्रदान गर्ने प्रक्रिया अघि बढाउन औपचारिक अनुरोध गरिएको हो।
‘कुसुमे रुमाल’, ‘चिनो’, ‘दुई थोपा आँसु’ र ‘दर्पण छायाँ’ जस्ता चर्चित चलचित्र निर्देशन गरेका घिमिरे दशकौँदेखि नेपाली फिल्म क्षेत्रमा सक्रिय छन्। भारतको कालिम्पोङमा जन्मिएका उनी हाल भारतीय नागरिक भए पनि नेपाली सिनेमामा पुर्याएको योगदानलाई उच्च मूल्याङ्कन गरिएको छ।
चलचित्र विकास बोर्डका अध्यक्ष दिनेश डी.सी.प्रति आभार व्यक्त गर्दै चलचित्र अन्तर्राष्ट्रिय प्रबर्द्धन समिति सदस्य केवल तामाङले यस कार्यलाई सराहनीय कदम भएको बताएका छन्।
