दुई छिमेकी प्रतिद्वन्द्वीको भिडन्त : लयमा फर्किएको जनकपुरलाई विराटनगरले रोक्न सक्ला त ?

प्रतियोगितामा जनकपुर र विराटनगर दुवै टोलीले आफ्नो चौथो खेल खेल्न लागेका हुन् । हालसम्मको अंक तालिकामा विराटनगरभन्दा जनकपुरको अवस्था बलियो देखिन्छ ।

तीनमध्ये दुई खेलमा जीत र एक खेलहा हारको नतिजा निकोलको जनकपुर चार अंकसहित तालिकाको दोस्रो स्थानमा आसिन छ ।

तीनमध्ये केवल एक खेलमा जीत र दुई खेलमा हारबाट दुई अंक बटुलेको विराटनगर भने तालिकाको छैटौँ स्थानमा छ ।

जनकपुरले जारी सिजनको शुरूआत हारबाट गरेको थियो । आफ्नो पहिलो खेलमा जनकपुरको टोली कर्णाली याक्ससँग १९ रनले पराजित भएको थियो ।

त्यसपछि लयमा फर्किएको जनकपुरले आफ्नो दोस्रो खेलमा काठमान्डु गोर्खाजलाई आठ विकेटले र तेस्रो खेलमा पोखरा एभेन्जर्सलाई नौ रनले हराएको थियो ।

विराटनगर किङ्सले हारबाटै तेस्रो संस्करणको शुरूआत गरेको थियो । विराटनगर आफ्नो पहिलो खेलमा चितवन राइनोजसँग आठ रनले हारेको थियो ।

दोस्रो खेलमा कर्णाली याक्ससँग चार विकेटले स्तब्ध: बनेको विराटनगरले तेस्रो खेलमा भने सुदूरपश्चिम रोयल्सलाई ३५ रनले पराजित गरेको थियो ।

विराटनगर र सुदूरपश्चिमबीचको खेल वर्षाका कारण पाँच–पाँच ओभरमा खेलाइएको थियो । पहिलो ब्याटिङ गरेको विराटनगरले पाँच ओभरमै केवल दुई विकेट गुमाएर एक सय पाँच रन बनाएको थियो ।

ठूलो लक्ष्य पछ्याउँदै जवाफी ब्याटिङमा ओर्लिएको सुदूरपश्चिमले भने निर्धारित ओभरमा तीन विकेट गुमाएर ७० रनमात्र बनाउन सकेको थियो ।

जारी सिजनको एनपीएलमा जनकपुरका लागि हालसम्म सर्वाधिक रन बनाउने ब्याट्सम्यान मोइन अली हुन् । उनले तीन खेलमा एक अर्धशतकको मद्दतले ९८ रन बनाएका छन् ।

विराटनगरका लागि सर्वाधिक रन बनाउने ब्याट्सम्यान भने लोकेश बम हुन् । उनले एक अर्धशतकको मद्दतले एक सय ३८ रन बनाएका छन् । उनी सर्वाधिक रन बनाउने सूचिमा पहिलो स्थानमा छन् ।

उनी एनपीएलको तेस्रो संस्करणमा एउटै खेलमा उच्च स्कोर बनाउने खेलाडी पनि हुन् । उनले कर्णाली याक्सविरुद्ध ८७ रन बनाएका थिए ।