पाँचथर, असार २२ – मेची राजमार्गअन्तर्गत पाँचथरको फिदिम–४ र हिलिहाङ–७ लाई जोड्ने हेवा खोलामा निर्माण भइरहेको ७० मिटर लामो मोडुलर बेलि ब्रिज करिब सम्पन्न हुने चरणमा पुगेको छ।
एकल स्प्यान र १० मिटर उचाइ भएको यो पुल नेपालकै सबैभन्दा लामो मोडुलर बेलि ब्रिजको रूपमा उल्लेख गरिएको छ।
करिब रू ३ करोड ४९ लाख लागतमा निर्माण भइरहेको पुल दोभान सुपर सौगात लाइट बिल्डर्स जेभीले निर्माण गरिरहेको हो।
हालसम्म कुल ६० प्रतिशत काम सम्पन्न भइसकेको छ। यदि निर्माण यथावत् गतिमा अघि बढ्यो भने एक साताभित्र निर्माण सकिने र भदौं लाग्दै यातायात सञ्चालनमा ल्याउने लक्ष्य रहेको इन्जिनियर सीताराम गौतमले जानकारी दिए। इन्जिनियर सीताराम गौतमका अनुसार “काम तिब्र गतिमा भइरहेको छ, अघि रफ्तारमा अघि बढ्ने हो भने करिब एक साता भित्र सम्पन्न भएर भदौं लाग्दा यातायात र ढुवानीका साधन सुचारु हुन्छन्,”
भौगोलिक चुनौतीका बाबजुद निर्माण कार्य तीव्र गतिमा अगाडि बढिरहेको छ। यो पुल सम्पन्न भएपछि पाँचथर, ताप्लेजुङसहितका गाउँपालिकाहरू — हिलिहाङ, याङवरक र फालेलुङ — सँग यातायातमा उल्लेख्य सुधार आउनेछ।
यो पुल मेची राजमार्गको विस्तारसँगै क्षेत्रीय यातायात तथा ढुवानी प्रणाली सुधारमा एक महत्वपूर्ण उपलब्धिका रूपमा हेरिएको छ।
