२० कात्तिक, काठमाडौं । निर्देशक नितेश तिवारीको फिल्म ‘रामायण’ ले प्रदर्शनमा आएदेखि नै दर्शक तथा बलिउड सेलिब्रेटीको प्रशंसा पाइरहेको छ। यसैक्रममा ‘एनिमल’ का निर्देशक संदीप रेड्डी वांगाले पनि फिल्मको खुलेर प्रशंसा गरेका छन्।
फिल्म हेरेपछि सामाजिक सञ्जाल एक्समा प्रतिक्रिया दिँदै वांगाले रणबीर कपूर र यशको अभिनय तथा पर्दामा उनीहरूको उपस्थितिको प्रशंसा गरेका हुन्।
उनले लेखेका छन्, ‘यदि तपाईं राम र रावणको भव्यता महसुस गर्न चाहनुहुन्छ भने कृपया रामायण हेर्नुहोस्। रणबीर कपूर र यशले आफ्ना पात्रलाई शानदार ढंगले प्रस्तुत गरेका छन्। पर्दामा दुवैको उपस्थिति निकै दमदार छ। मलाई यो फिल्म निकै मन पर्यो।’
वांगाले फिल्मका निर्माता नमित मल्होत्राको समेत प्रशंसा गरेका छन्। कुनै फिल्मप्रति यति धेरै समर्पित निर्माता आफूले अहिलेसम्म नदेखेको उनको भनाइ छ।
नितेश तिवारीको निर्देशनमा बनेको ‘रामायण’ मा रणबीर कपूर भगवान् श्रीराम, साई पल्लवी माता सीता, रवि दुबे लक्ष्मण र यश रावणको भूमिकामा देखिएका छन्।
फिल्म दुई भागमा निर्माण गरिएको छ। यसको पहिलो भाग नोभेम्बर ५ मा प्रदर्शनमा आएको हो भने दोस्रो भाग सन् २०२८ मा रिलिज हुने बताइएको छ।
